Rede RINEF-CISOC

A Rede de Investigación en Educación e Formación para a Cidadanía e a Sociedade do Coñecemento (RINEF-CISOC) iniciou a súa constitución e o desenvolvemento das súas primeiras iniciativas no ano 2009, coa vontade de promover e articular actuacións que posibilitasen a xeración de sinerxias, cada vez máis fortes e competitivas, no ámbito da investigación e a difusión de coñecemento, atendendo a unha dobre e complementaria intencionalidade: dunha banda, contribuír ao logro dun maior e mellor desenvolvemento da investigación educativa na e para a sociedade; doutra, alentar novas lecturas (multi e interdisciplinares, complexas, inclusivas, etc.) na investigación educativa, poñendo en valor as súas potencialidades para dar resposta a necesidades e demandas que melloren a calidade da educación, o benestar das persoas, a cultura da sustentabilidade e o desenvolvemento humano.

Máis en concreto, as súas actuacións veñen orientándose cara a:

• Ampliación e consolidación da capacidade de inserción da investigación educativa e das Ciencias da Educación nas realidades cotiás da sociedade galega e nas comunidades científicas que conforman o SUG; así como naqueles proxectos de innovación e desenvolvemento que teñan como finalidade mellorar o sistema educativo, a calidade de vida e o benestar social da cidadanía.
• Optimización e proxección en diferentes contextos xeográficos, socioeducativos e culturais das iniciativas investigadoras promovidas polos grupos que integran a Rede. Preténdese un enfoque interdisciplinario e colaborativo que aproveite as potencialidades epistemolóxicas, metodolóxicas, tecnolóxicas e infraestruturais postas ao seu dispor, fundamentalmente nas interaccións establecidas entre: a escola, as familias e a sociedade; as realidades do cotiá-local e o global-planetario; as tecnoloxías da información e da comunicación e a creación e difusión do coñecemento; a formación e os procesos de inserción sociolaboral; a educación para a cidadanía e a inclusión social; e os dereitos cidadás na educación.

A Rede de Investigación en Educación e Formación para a Cidadanía e a Sociedade do Coñecemento (RINEF-CISOC) está integrada por 8 grupos de Investigación, todos pertencentes ao Sistema Universitario Galego:

•  catro (4) deles adscritos á Universidade de Santiago de Compostela, tres (3) no campus de Santiago de Compostela e un (1) no campus de Lugo;
•  dous (2) á Universidade de A Coruña, no seu campus da Coruña; e
•  dous (2) á Universidade de Vigo: un deles no campus de Ourense e outro intercampus (Ourense-Pontevedra) que se incorpora á Rede no ano 2016.